Foto: Kuvendi i Malit të Zi / Skupština Crne Gore
Qeveria e Malit të Zi pret që Grupi Punues për hartimin e Marrëveshjes së Aderimit në Bashkimin Evropian të përfundojë punën jo shumë kohë pas mbylljes së kapitullit të fundit negociues, me qëllim që vendi të bëhet anëtar i BE-së deri në vitin 2028.
Këtë e bëri të ditur kryenegociatori i Malit të Zi me BE-në, Predrag Zenoviq, gjatë një seance të Komitetit parlamentar për integrime evropiane. Ai tha se grupi punues ka për detyrë të inkorporojë rezultatet e kapitujve negociues në tekstin e marrëveshjes dhe të përgatisë dokumentacionin përkatës teknik-juridik.
Zenoviq theksoi se nuk mund të jepet një afat i saktë për përfundimin e punës, por procesi po zhvillohet me dinamikë të fortë dhe nën mbikëqyrjen e Komisionit Evropian.
Sipas tij, gjeopolitika mund të ndikojë në përshpejtimin e procesit, por nuk mund të zëvendësojë përmbajtjen dhe standardet e nevojshme.
Ai shtoi se Mali i Zi shihet si një nga vendet udhëheqëse në procesin e integrimeve evropiane dhe ka përgjegjësi të veçantë në këtë fazë të re të zgjerimit të BE-së.
Deputetët e pushtetit gjithashtu shprehën gatishmërinë për të kontribuar në përshpejtimin e procesit, duke theksuar synimin që vendi të anëtarësohet në BE deri në vitin 2028.
