Presidenti i Këshillit Evropian, Charles Michel, tha sot në Bruksel se Samiti Bashkimi Evropian – Ballkani Perëndimor konfirmon përkushtimin e vendosur të Bashkimit për t’i parë vendet e rajonit si anëtarë, por që vendet e atij rajoni pritet të përshpejtojnë procesin e reformave.
Ai tha gjithashtu se Samiti është një mundësi për t’u dhënë inkurajim shtesë politik vendeve kandidate, përfshirë Malin e Zi, në mënyrë që të zbatojnë reformat e nevojshme.
“Shpresoj se hapat shtesë nga Mali i Zi dhe vendet e tjera së shpejti do të jenë të mundur,” tha Michel.
Ai shtoi se pret më shumë reforma nga vendet e rajonit të Ballkanit Perëndimor, veçanërisht në fushën e sundimit të ligjit dhe pavarësisë së gjyqësorit.
“Dhe pala jonë do të bëjë pjesën e saj, prandaj filluam një debat strategjik në nivel liderësh për të identifikuar se çfarë duhet të bëjmë”, tha Michel në prag të samitit.
Ai shtoi se dëshiron të shohë më shumë investime dhe zhvillim ekonomik në mënyrë që efektet pozitive të integrimit të shihen sa më shpejt në terren.
“Gjëja më e rëndësishme për BE-në është që ne të mbetemi të bashkuar. Procesi i zgjerimit mbetet i bazuar në merita, të cilën do t’ua shpjegojmë edhe një herë partnerëve tanë nga Ballkani Perëndimor. Ju e dini qëndrimin tim personal se ne duhet të jemi gati deri në vitin 2030 dhe se të dyja palët duhet të bëjnë përpjekje”, tha Michel.
Sot në Bruksel mbahet samiti Bashkimi Evropian – Ballkani Perëndimor, në fokus të afrimit të mëtejshëm të dy palëve, por edhe çështjeve të caktuara kontestuese.
