Presidenti ukrainas, Volodymyr Zelensky, akuzoi Rusinë se ka vazhduar sulmet ndaj infrastrukturës energjetike të Ukrainës, pavarësisht njoftimit të presidentit amerikan, Donald Trump, për një marrëveshje që parashikon ndalimin e sulmeve ndaj objekteve energjetike.
Zelensky deklaroi se një dron rus i tipit Shahed goditi një central elektrik në Kiev, duke shkaktuar ndërprerje të energjisë në disa zona, ndërsa sulme të tjera u regjistruan edhe në rajonin e Harkivit. Ai theksoi se Ukraina e mbështet armëpushimin, por kërkoi që edhe Moska ta respektojë atë.
Deri më tani, Rusia nuk ka komentuar njoftimin e Trumpit, ndërsa pretendimet për sulmet e fundit nuk janë konfirmuar në mënyrë të pavarur.
Ndërkohë, vendimi i Uashingtonit për lehtësimin e përkohshëm të sanksioneve ndaj eksporteve ruse të naftës ka shkaktuar reagime të ashpra në Ukrainë, Evropë dhe në mesin e disa ligjvënësve amerikanë, të cilët paralajmërojnë se kjo mund të rrisë të ardhurat e Moskës për financimin e luftës.
Shefja e diplomacisë së Bashkimit Evropian, Kaja Kallas, përsëriti se Evropa nuk do ta ulë presionin ndaj Rusisë dhe njoftoi se BE-ja po shqyrton masa të reja ndëshkuese ndaj Moskës.
