Foto: Qeveria e Malit të Zi / Vlada Crne Gore
Në Ministrinë e Punëve të Jashtme është nënshkruar sot Marrëveshja për ndërveprueshmërinë ndërmjet Ministrisë së Punëve të Jashtme, Ministrisë së Punëve të Brendshme dhe Agjencisë për Sigurinë Kombëtare, me qëllim përmirësimin e sistemit të vizave të Malit të Zi dhe përafrimin e tij të mëtejshëm me standardet e Bashkimit Evropian.
Marrëveshja u nënshkrua nga zëvendëskryeministri dhe ministri i jashtëm Ervin Ibrahimoviq, ministri i brendshëm Danillo Sharanoviq dhe drejtori i Agjencisë për Sigurinë Kombëtare Ivica Janoviq.
Ajo u përgatit pas bashkëpunimit të ngushtë ndërinstitucional dhe pas marrjes së një opinioni pozitiv nga Komisioni Evropian.
Sipas Ibrahimoviqit, kjo marrëveshje përfaqëson një hap të rëndësishëm në reformimin e procedurave të vizave dhe në harmonizimin me rregulloret dhe direktivat e BE-së, duke konfirmuar gjithashtu ndërveprueshmërinë e sistemeve të institucioneve që merren me lëshimin e vizave.
Ai theksoi se ky proces përmbush një nga obligimet e Agjendës së Reformave dhe mundëson lirimin e rreth 3.5 milionë eurove grante për reforma të mëtejshme.
Në të ardhmen, pritet krijimi i Sistemit të ri Informativ të Vizave dhe sistemit të e-vizave, i cili do të sjellë procedura më moderne, më të shpejta dhe më të sigurta.
Sipas autoriteteve, kjo do të rrisë aksesin në vizat malazeze, do të forcojë sigurinë dhe do ta pozicionojë vendin më mirë si destinacion turistik dhe investues, duke e afruar më shumë me standardet evropiane.
