Foto: Qeveria e Malit të Zi / Vlada Crne Gore
Zëvendëskryeministri dhe ministri i Zhvillimit Ekonomik, Nik Gjeloshaj, mori pjesë në një takim ministror të organizuar nga drejtoritë e përgjithshme të Komisionit Evropian, ku u prezantuan hapat kryesorë për përfshirjen e vendeve të Ballkanit Perëndimor në sistemin evropian të roaming-ut “Roam Like at Home”.
Takimi u fokusua në krijimin e këtij sistemi ndërmjet Bashkimit Evropian dhe vendeve të Ballkanit Perëndimor, si pjesë e integrimit në tregun unik digjital evropian.
Gjatë takimit u prezantuan elementet kryesore të udhëzimeve negociuese të miratuara nga Këshilli i Bashkimit Evropian, si dhe hapat e ardhshëm në procesin e negociatave për përfshirjen e vendeve të Ballkanit Perëndimor në sistemin evropian të roaming-ut me shtetet anëtare të BE-së dhe për nënshkrimin e marrëveshjeve sektoriale përkatëse.
Autoritetet malazeze e mirëpritën fuqishëm miratimin e këtyre udhëzimeve, duke e cilësuar si një hap të rëndësishëm drejt integrimit në tregun unik digjital evropian. Ata theksuan se Mali i Zi mbetet i përkushtuar ndaj këtij procesi, me qëllim që qytetarët të përfitojnë sa më shpejt nga ulja e kostove të roaming-ut dhe shërbime më të avancuara digjitale.
