Foto: Ministria e Zhvillimit Ekonomik / Ministarstvo ekonomskog razvoja
Zëvendëskryeministri për Politikë Ekonomike dhe njëherësh ministër i Zhvillimit Ekonomik, Nik Gjeloshaj, ka hapur në Budva prezantimin rajonal të publikimit të Organizatës për Bashkëpunim dhe Zhvillim Ekonomik “SME Policy Index: Western Balkans and Türkiye 2026”, një raport i rëndësishëm ndërkombëtar që vlerëson politikat për mbështetjen e ndërmarrjeve të vogla dhe të mesme në rajon.
Në këtë ngjarje morën pjesë përfaqësues të Organizatës për Bashkëpunim dhe Zhvillim Ekonomik, Bashkimit Evropian, institucioneve ndërkombëtare, trupit diplomatik dhe institucioneve ekonomike nga vendet e Ballkanit Perëndimor dhe Turqia.
Nga Ministria u theksua se organizimi i këtij eventi në Mal të Zi tregon bashkëpunimin rajonal dhe reformat e vazhdueshme që vendi po ndërmerr për përmirësimin e klimës së biznesit dhe forcimin e konkurrueshmërisë ekonomike.
Gjeloshaj tha se Mali i Zi është në një fazë të thellimit të reformave ekonomike dhe përshpejtimit të integrimeve evropiane, ku politikat për zhvillimin e ndërmarrjeve të vogla dhe të mesme janë tregues kyç i gatishmërisë për anëtarësim në BE.
Fokusi kryesor, sipas tij, është te transformimi digjital, tranzicioni i gjelbër dhe rritja e qëndrueshmërisë së ekonomisë. Në këtë drejtim po punohet në përmirësimin e kuadrit ligjor, digjitalizimin e administratës publike, zhvillimin e shërbimeve elektronike, si dhe investimet në infrastrukturën digjitale dhe aftësitë digjitale.
Në lidhje me tranzicionin e gjelbër, u theksua se Mali i Zi, si një shtet ekologjik me potencial në energjinë e rinovueshme, e sheh zhvillimin e qëndrueshëm si një faktor të rëndësishëm për konkurrueshmërinë e ardhshme, veçanërisht në energjinë diellore, energjinë e erës, efikasitetin energjetik, turizmin e qëndrueshëm dhe modernizimin e transportit.
Raporti i Organizatës për Bashkëpunim dhe Zhvillim Ekonomik u vlerësua si një mjet që tregon progresin e vendeve të rajonit në zhvillimin e biznesit të vogël dhe të mesëm, por edhe fushat ku nevojiten reforma të mëtejshme.
Në fund u theksua se Ministria e Zhvillimit Ekonomik mbetet e përkushtuar për ndërtimin e një ekonomie konkurruese, inovative dhe të qëndrueshme, me mbështetje të fortë për bizneset e vogla dhe të mesme dhe përafrim të vazhdueshëm me standardet evropiane.
