Komisioni Kushtetues i Parlamentit të Malit të Zi sot duhej të përcaktonte propozimin për zgjedhjen e katër gjyqtarëve të Gjykatës Kushtetuese, por deklarimi u shty për të enjten. Zgjedhja e gjyqtarëve të rinj të Gjykatës Kushtetuese kërkon mbështetjen e 54 deputetëve, gjë që për momentin nuk është e sigurt se do të ndodhë, duke pasur parasysh krizën politike në të cilën ndodhet Mali i Zi. Kryetarja e Komisionit Kushtetues, Simonida Kordiq, tha në seancë se nga krerët e klubeve parlamentare është njoftuar se për momentin nuk ka një marrëveshje të finalizuar prej dy të tretave për katër gjyqtarët dhe nevojitet kohë për të mundësuar kompletimin e Gjykatës Kushtetuese. Kordiq theksoi se duhet ta kompletojnë Gjykatën Kushtetuese për shkak të zhbllokimit të atij institucioni, zgjedhjeve të ardhshme, integrimeve evropiane, por më së shumti për hir të qytetarëve.
