Anëtarësimi i Malit të Zi në BE do të jetë në interes të të gjitha vendeve të rajonit, tha ministrja e Çështjeve Evropiane Maida Gorçeviq.
Këtë ajo e ka thënë gjatë një takimi me zëvendëskryeministren e Qeverisë së Kosovës, Emilia Rexhepi.
“Mali i Zi është vendi i parë kandidat që negocion me BE-në sipas metodologjisë së re dhe ne supozojmë se ky model do të zbatohet për të gjithë kandidatët e ardhshëm. Mali i Zi është i gatshëm të ndajë njohuritë dhe përvojën e fituar dhe të ndihmojë Kosovën dhe vendet e tjera në procesin e pranimit në BE”, tha Gorçeviq.
Ajo shtoi se anëtarësimi i Malit të Zi në BE do të jetë në interes të të gjitha vendeve të rajonit, sepse Mali i Zi do të mbrojë dhe përfaqësojë zgjerimin e mëtejshëm sipas parimit të regatës dhe do të jetë një mbështetje e fortë për fqinjët e tij në përmbushjen e detyrave kërkuese në procesin e negociatave.
“Përveç mbështetjes në fushën e integrimeve evropiane, Mali i Zi mund të lidhet me Kosovën përmes projekteve dhe iniciativave të ndryshme të përbashkëta, por edhe të mësojë nga Kosova në fusha të tilla si digjitalizimi i gjyqësorit, në të cilin ata janë udhëheqës në të gjithë rajonin”, tha Gorçeviq.
Siç njofton Ministria e Çështjeve Evropiane, bashkëbisedueset diskutuan për fushat në të cilat mund të përmirësohet bashkëpunimi mes dy vendeve, para së gjithash në fushën e bashkëpunimit ndërkufitar dhe fondeve IPA, por edhe në fushën e sundimit të ligjit dhe forcimit të lidhjeve ekonomike.
“Ato shprehën kënaqësinë e tyre për zbatimin e suksesshëm të programit të bashkëpunimit ndërkufitar ndërmjet Malit të Zi dhe Kosovës, duke u pajtuar se ai paraqet një shembull të shkëlqyer të marrëdhënieve të mira fqinjësore mes dy vendeve nga aspekti ekonomik, turistik dhe kulturor”, thuhet në njoftim.
Zëvendëskryeministrja Rexhepi e përgëzoi Malin e Zi për rezultatet e shkëlqyera në procesin e anëtarësimit në BE dhe falënderoi për mbështetjen që Mali i Zi i ka dhënë Kosovës në arritjen e standardeve evropiane. Ajo tha se fokusi i punës së Qeverisë së Kosovës është sundimi i ligjit, lufta kundër korrupsionit, si dhe rimëkëmbja ekonomike dhe politika sociale.
“Ndihma e Malit të Zi në fushën e integrimeve evropiane është shumë e rëndësishme për ne, por ne duam të përmirësojmë më tej marrëdhëniet e fqinjësisë së mirë dhe të lidhim qytetet tona. Dy vendet mund të bashkëpunojnë përmes nismave të ndryshme rajonale, por edhe përmes projekteve në fushën e mjedisit,” tha Rexhepi.
Bashkëbisedueset vlerësuan se Mali i Zi dhe Kosova ushqejnë marrëdhënie tradicionalisht të mira dhe miqësore, si dhe bashkëpunim domethënës në shumë fusha.
“Ato ranë dakord se ka shumë hapësirë për nisjen e projekteve zhvillimore në të mirë të qytetarëve të të dyja vendeve, si dhe nismave të përbashkëta dhe projekteve të bashkëpunimit ndërkufitar”, përfundon deklarata e Ministrisë së Çështjeve Evropiane.
