Forca e re Demokratike, vendimin e Komisionit Shtetëror të Zgjedhjeve, i cili pranoi ankesën e Partisë Boshnjake dhe ua dha atyre një mandate e karakterizon si vendim antikushtetues
.”Një vendim i tillë përfaqëson një precedent në praktikën zgjedhore, sepse ligji zgjedhor interpretohet në favor të një komuniteti pakicë dhe në dëm të një komuniteti të një pakicë tjetër kombëtare”, deklaroi funksionari i Forcës, Gezim Haxhibeti , në konferencën e sotme për shtyp.
Ai shtoi se me këtë vendim politik, dëshirohet të dobësohet pozita negociuese e partive politike shqiptare në procesin post-zgjedhor për formimin e pushtetit në komunën e Ulqinit.
“Kjo nuk është në përputhje me vullnetin e votuesve të cilët u dhanë mbështetjen e tyre bindëse për udhëheqjen e këtij qyteti partive shqiptare dhe më së shumtit Forcës, si parti nacionale e cila ka një elektorat të qëndrueshëm ndër vite dhe e cila vepron pa asnjë konflikt dhe ndarje të brendshme dhe për këtë edhe gëzon mbështetje të madhe nga qytetarët, e cila edhe në periudhën e ardhshme do të jetë një subjekt politik kyç në formimin e pushtetit të dhe në menaxhimin e Komunës së Ulqinit “, deklaroi Haxhibeti.
Ai paralajmëroi gjithashtu paraqitjen e një ankese kushtetuese në Gjykatën Kushtetuese kundër vendimeve të cilat shkojnë në dëm të popullit shqiptar si pakicë në Mal të Zi. Me vendimin e KSHZ-së , Partia Boshnjake, për të parën herë që nga themelimi i saj, bëhet parti parlamentare në Kuvendin komunal të Ulqinit, ndërsa Forca sipas këtij vendimi nga nënte mandate bie në tetë mandate.
