Rusia kreu një tjetër sulm me raketa balistike ndaj Kievit gjatë natës, sulmi i tretë ndaj kryeqytetit ukrainas në më pak se një javë.
Sipas autoriteteve ukrainase, mbrojtja ajrore arriti të rrëzojë 139 nga 169 dronët e lëshuar nga Rusia, por nuk mundi të neutralizonte asnjërën nga pesë raketat balistike të përdorura në sulm, për shkak të mungesës së interceptorëve të prodhuar në SHBA.
Sulmi ndodhi në kohën kur në Ankara po zhvillohet samiti i NATO-s, ku presidenti amerikan Donald Trump pritet të zhvillojë një takim me presidentin ukrainas Volodymyr Zelensky.
Ky i fundit pritet të kërkojë sërish furnizimin e Ukrainës me sisteme shtesë të mbrojtjes ajrore, veçanërisht interceptorët që konsiderohen të domosdoshëm për rrëzimin e raketave balistike.
Sipas autoriteteve në Kiev, një grua humbi jetën dhe dy persona u plagosën nga sulmi i natës.
Kryebashkiaku Vitali Klitschko njoftoi se bombardimet shkaktuan zjarre në një zonë magazinimi dhe në një ndërtesë jorezidenciale në dy lagje të qytetit. Pamjet nga terreni treguan zjarrfikësit duke luftuar me flakët deri në orët e para të mëngjesit.
Edhe qyteti i dytë më i madh i Ukrainës, Harkivi, u godit me raketa. Sulmet shkaktuan dëme në banesa private dhe në një kishë, ndërsa një tjetër goditje mbi një ndërtesë banimi la të vdekur dy persona, sipas kryebashkiakut Ihor Terekhov.
Moska ka shtuar ndjeshëm intensitetin e sulmeve ajrore në muajt e fundit, ndërsa përparimi i forcave ruse në front ka ngecur. Vetëm gjatë muajit korrik, sulmet ndaj Kievit dhe rajonit përreth kanë shkaktuar rreth 60 viktima. Që nga fillimi i muajit, mbrojtja ajrore ukrainase ka arritur të rrëzojë vetëm katër nga 54 raketat balistike të lëshuara nga Rusia.
Ndërkohë, presidenti Donald Trump deklaroi gjatë samitit në Ankara se beson se lufta në Ukrainë mund të “zgjidhet, shpresojmë, së shpejti”, pas bisedimeve që ka zhvilluar me presidentin Zelensky dhe presidentin rus Vladimir Putin.
