Ministri i Administratës Publike Marash Dukaj ka takuar sot ambasadorin e Republikës së Sllovakisë në Mal të Zi Boris Gandel. Ai theksoi se të dy vendet trashëgojnë marrëdhënie tradicionalisht të mira dhe miqësore dhe se ka hapësirë për thellim të bashkëpunimit në shumë fusha të reformës së administratës publike. “Ministria e Administratës Publike ka një mision të rëndësishëm në rrugën evropiane të Malit të Zi dhe është plotësisht e përkushtuar për përmirësimin dhe optimizimin e procesit brenda administratës. Ne jemi të përkushtuar për krijimin e një administrate publike efikase, të orientuar drejt shërbimeve në nivel shtetëror dhe lokal, të karakterizuar nga rritja e besimit të publikut në punën e saj”, tha Dukaj. Sipas deklaratës së Ministrisë, Gandel theksoi se Republika Sllovake mbështet fuqishëm dhe në vazhdimësi integrimin evropian të Malit të Zi, si dhe politikën e zgjerimit të BE-së dhe është e gatshme të ofrojë mbështetje politike dhe eksperte në të gjitha nivelet në procesin e integrimit të Malit të Zi në BE. “Përmirësimi i efikasitetit dhe efektivitetit të administratës publike në Mal të Zi është një parakusht për të gjitha reformat e tjera dhe do të keni mbështetjen e plotë të Sllovakisë në modernizimin e administratës publike,” tha ambasadori. Të dyja palët shprehën pritshmërinë që bashkëpunimi mes Malit të Zi dhe Sllovakisë do të vazhdojë edhe në të ardhmen, përmes zbatimit të programeve dhe projekteve të përbashkëta, shkëmbimit të përvojave dhe praktikave të mira në reformën e administratës publike, monitorimit dhe vlerësimit të zbatimit të Strategjisë së Reformës së Administratës Publike, planifikimit dhe vendimmarrjes më të mirë strategjike në fushën e administratës publike.
