Presidenti i Malit të Zi, Millo Gjukanoviq, është i mendimit se politika e zgjerimit të Bashkimit Evropian ishte një nga politikat më të suksesshme të BE-së, por që, për fat të keq, kur zgjerimi në vendet e Ballkanit Perëndimor hyri në rendin e ditës, kishte një ngërç. “Unë mendoj se ky ngërç hap hapësirë për ndikimin e palëve të treta. Fatkeqësisht, ato palë të treta veprojnë nga platforma që janë kundër interesave thelbësore evropiane dhe kjo sjell konfuzion shtesë në politikat e vendeve të Ballkanit Perëndimor,” tha Gjukanoviq në një intervistë për TV21 të Maqedonisë së Veriut. Sipas tij, tani jemi dëshmitarë të ideve të rinovuara në lidhje me rikompozimin e Ballkanit Perëndimor. Ai shton se këto janë idetë nga fillimi i viteve 90 të shekullit të kaluar, kur idetë e formimit të tre shteteve të mëdha të Ballkanit Perëndimor ishin në funksion. Gjukanoviq thotë se e ardhmja më e mirë për të gjitha shoqëritë në Ballkanin Perëndimor është e ardhmja Evropiane dhe Euro-Atlantike. “Të gjitha problemet tona që ne shohim, prapambetja ekonomike, si dhe demokracia dhe paqëndrueshmëria janë rezultat i mungesës sonë të gjatë nga Evropa,” tha ai. Gjukanoviq është i mendimit se BE duhet të fillojë negociatat me Maqedoninë e Veriut dhe Shqipërinë sa më shpejt të jetë e mundur. “Liberalizimi i vizave duhet t’i jepet Kosovës dhe një shtysë shtesë në procesin e negociatave me Malin e Zi dhe Serbinë,” tha Gjukanoviq. Kreu i shtetit malazes kujtoi se Ballkani Perëndimor është natyrshëm euroskeptik, sepse ata mbetën jashtë rrjedhës kryesore të civilizimit Evropian pas Luftës së Dytë Botërore. Ai përsëriti se kthimi i Shteteve të Bashkuara në partneritetin me Evropën është një lajm i mirë. “Unë mendoj se Ballkani Perëndimor do të marrë përfitime të mëdha nga ajo Aleancë e ripërtërirë e Atlantikut. Unë mendoj se do të ndikojë ndjeshëm në përfundimin e procesit të zgjerimit, por do të ketë gjithashtu një numër efektesh të tjera pozitive,” tha Gjukanoviq.
