Në shkollat fillore dhe të mesme në Mal të Zi, nesër ora e parë do t’i kushtohet parandalimit të dhunës së bashkëmoshatarëve, njoftoi ministri i Arsimit Miomir Vojinoviq.
Vojinoviq tha në konferencën për shtyp se Ministria e Arsimit do të angazhojë drejtorë në mënyrë të jashtëzakonshme dhe do të forcojë punën e ekipeve të shkollave në parandalimin e dhunës së bashkëmoshatarëve.
Ai tha se nga sot do të nisë me punë platforma digjitale me numër 080 777 777, ku do të raportohen 24 orë në ditë të gjitha format e dhunës së bashkëmoshatarëve dhe ku do të regjistrohet çdo bisedë.
Vojinoviq ka theksuar se thirrjet në atë numër do të jenë pa pagesë për të gjitha rrjetet në Mal të Zi.
Ai tha se do të rishikohet rregullorja për normat dhe standardet, ku parashihet numri i psikologëve dhe pedagogëve për punë në shkollat fillore, me qëllim që të rritet numri i personave që do të punojnë në parandalimin e dhunës së bashkëmoshatarëve.
Vojinoviq u bëri thirrje Ministrive të Punëve të Brendshme dhe Shëndetësisë, si dhe institucioneve sociale, të punojnë në parandalimin e dhunës së bashkëmoshatarëve.
Siç tha ai, ata kanë biseduar individualisht me nxënës dhe prindër, si dhe kanë pasur diskutime në grup me prindër dhe nxënës.
Ai vlerësoi se është e nevojshme të miratohen zgjidhje të ndryshme ligjore, por siç tha ai, Ministria e Arsimit nuk mund ta bëjë e vetme.
“Nevojitet bashkëpunim i drejtpërdrejtë me Ministrinë e Drejtësisë dhe ministritë tjera për të arritur një zgjidhje të pranueshme”, tha Vojinoviq dhe shtoi se do të intensifikojë punën për parandalimin e dhunës së bashkëmoshatarëve.
Vojinoviq tha se ka folur me ministrin e Punëve të Brendshme, Filip Axhiq, për mundësinë që një polic të jetë gjatë gjithë kohës në shkollë.
