Fillimi i këtij viti shkollor për Ministrinë e Arsimit, Shkencës dhe Inovacionit dhe Telekom-in malazez nënkupton vazhdimin e bashkëpunimit dhe mbështetjes gati dy dekadash.
Sot u ra dakord që të vazhdojë ofrimi i shërbimeve falas të internetit për shkollat në Mal të Zi, ndërsa detajet e projektit dhe drejtimet shtesë të bashkëpunimit u diskutuan nga ministrja e Arsimit, Shkencës dhe Inovacionit, Angjella Jakshiq Stojanoviq dhe Dushan Banoviq, drejtor i Sektorit të Zhvillimit të Shërbimeve dhe Transformimit Digjital në Telekom.
Telekom ka 17 vjet që mbështet sistemin arsimor të Malit të Zi duke ofruar internet falas për rreth 170 shkolla fillore dhe të mesme dhe institucione parashkollore në qytete, ndërsa gjatë viteve të mëparshme në projekt janë përfshirë edhe shkollat malazeze në zonat rurale dhe periferike. Vlera e paketave të internetit që Telekomi ofron falas për institucionet arsimore ka shkuar në rreth 100 mijë euro, për vitin paraprak.
Ministrja e Arsimit, Shkencës dhe Inovacionit, Angjella Jakshiq Stojanoviq, me rastin e nënshkrimit të kësaj marrëveshjeje, theksoi: “Marrëveshja e sotme nuk është vetëm një akt formal, por një konfirmim i angazhimit tonë të përbashkët për t’i siguruar çdo nxënësi në Mal të Zi akses në mjetet moderne arsimore. Përmes këtij bashkëpunimi, Deutsche Telekom Group dhe Telekom-i malazez kanë treguar përkushtimin e tyre ndaj përgjegjësisë sociale dhe kuptimin e rëndësisë së investimit në arsim. Kjo mbështetje është e paçmuar për përmirësimin e sistemit arsimor. Ne vazhdojmë së bashku, me një vizion dhe synim të qartë – që çdo fëmijë në Mal të Zi të ketë mundësi të barabarta për arsim cilësor.“
