Presidenti amerikan, Joe Biden ka premtuar se do të vazhdojë mbështetja amerikane për Ukrainën, ndonëse fondet ushtarake për të janë përjashtuar nga një marrëveshje e minutit të fundit, që e ka shmangur mbylljen e Qeverisë amerikane.
Ky vendim i përkohshëm, i miratuar për ta shmangur mbylljen, nuk përfshin ndihmë ushtarake për Kievin në vlerë të gjashtë miliardë dollarëve – prioritet i lartë i Shtëpisë së Bardhë. Republikanët e linjës së ashpër e kundërshtojnë ndihmën e mëtejme ushtarake dhe kritikojnë qëndrimin e Bidenit ndaj luftës.
Mirëpo Biden tha të dielën se Ukraina mund të llogarisë në mbështetjen e Shteteve të Bashkuara.
“Ne nuk mundemi, në asnjë rrethanë, të lejojmë pengimin e ndihmës së SHBA-së në Ukrainë”, ka thënë Biden. “Unë mund të rikonfirmoj për Ukrainën se do ta realizojmë këtë”, ka thënë ai duke iu referuar fondeve.
“Dua t’i siguroj aleatët amerikanë se mund të mbështeten në ndihmë tonë, se nuk po largohemi askund”.
Deri më tani, Shtetet e Bashkuara kanë ndarë mbi 46 miliardë dollarë si ndihmë ushtarakë për Ukrainën, prej nisjes së luftës së Rusisë në këtë shtet, në shkurt të vitit 2022.
Presidenti Biden i ka kërkuar kongresit edhe 24 miliardë dollarë shtesë. Muajt e fundit, SHBA-ja ka nisur në Ukrainë edhe raketa me rreze të gjatë dhe tanke Abrams.
Ndërkohë forcat e Kievit vazhdojnë të luftojnë në kundërofensivën, që sipas ekspertëve, është duke u zhvilluar me ritëm të ngadalshëm në jug të shtetit.
