Foto: predsjednik.me
Presidenti i Malit të Zi, Jakov Millatoviq, u ka dërguar një letër aktorëve politikë përpara Samitit BE – Ballkani Perëndimor, i cili do të mbahet më 5 qershor në Tivat.
Ai thekson se ky samit është një nga ngjarjet më të rëndësishme për vendin dhe një mundësi për të treguar se Mali i Zi është i gatshëm për anëtarësim në Bashkimin Evropian.
Millatoviq kërkon nga të gjitha forcat politike që të tregojnë seriozitet, përgjegjësi institucionale dhe pjekuri politike, duke theksuar se vendi duhet të përmbushë reformat e premtuara që nga fillimi i negociatave me BE-në rreth 15 vite më parë.
Sipas tij, qytetarët presin rend, institucione funksionale, drejtësi dhe rezultate konkrete nga procesi i integrimit evropian.
Ai thekson se anëtarësimi në BE ka kuptim vetëm nëse Mali i Zi ndërton një shtet të rregullt, solidar dhe ekonomikisht të fortë. Për këtë arsye, ai përmend pesë detyra kryesore që duhet të përmbushen.
Së pari është reforma zgjedhore, që përfshin pastrimin e listës së votuesve, rregulla më të qarta zgjedhore, rritje të përgjegjësisë së përfaqësuesve politikë, si dhe mundësinë e listave të hapura dhe forcimin e barazisë gjinore.
Së dyti janë ndryshimet kushtetuese, të cilat duhet të bëhen përmes dialogut politik dhe përfshirjes së ekspertëve, me qëllim forcimin e shtetit të së drejtës dhe ndarjen e pushteteve.
Si detyrë e tretë ai përmend funksionimin e plotë të Gjykatës Kushtetuese, duke theksuar se ajo duhet të garantojë mbrojtjen e Kushtetutës dhe të drejtave të qytetarëve.
E katërta është harmonizimi i ligjeve me legjislacionin dhe standardet e Bashkimit Evropian, si dhe forcimi i të drejtave të njeriut.
Detyra e pestë është ndërtimi i imazhit të Malit të Zi si një shtet i ardhshëm anëtar i BE-së, ku institucionet funksionojnë, vendimet merren me përgjegjësi dhe interesi publik vendoset mbi interesat partiake.
Në fund, Millatoviq thekson se samiti në Tivat është një mundësi e madhe dhe një përgjegjësi për të gjitha palët politike, për të treguar se Mali i Zi është i gatshëm të përfundojë rrugën e tij drejt Bashkimit Evropian.
