Përmbytje të fuqishme dhe të menjëhershme kanë kthyer rrugët në lumenj të tërbuar në Itali, ndërsa një stuhi masive po godet Evropën.
Pamjet tronditëse tregonin makina që lundronin si varka në rrugët e përmbytura në Chiavari, në Itali. Uji përfshiu shpejt qytetin, ndërsa banorët u panë duke ecur me vështirësi në rrugët e përmbytura.
Meteorologët raportuan se në Chiavari, i cili ndodhet rreth 40 kilometra në lindje të Xhenovës, ranë gjithsej 126 milimetra shi. Një paralajmërim për përmbytje u lëshua të enjten për rajonin e Ligurias, ku përfshihen Xhenova dhe Chiavari. Rreziku i përmbytjeve vazhdoi edhe të premten.
Ndërkohë, 250 persona u evakuuan nga një kamping buzë lumit në Bergamo.
Ekipet e emergjencave u angazhuan pasi një masë balte dhe shkëmbinjsh rrëshqiti në shpat, ndërsa niveli i lumit u rrit me shpejtësi.
Ekspertët kanë paralajmëruar se Evropa do të përballet me stuhi të fuqishme, të cilat tashmë kanë filluar të shkaktojnë dëme.
Majorka, në Spanjë, u vu në gatishmëri të lartë të enjten, ndërsa zyrtarët paralajmëruan për “masa paraprake ekstreme” për shkak të stuhisë së pritshme.
Një paralajmërim urgjent për motin u lëshua, ndërsa stuhitë tropikale pritej të godisnin Ishujt Balearë.
Rrufetë nuk u ndalën gjatë gjithë natës, ndërsa shiu përmbyti rrugët dhe pemët u shkulën me rrënjë nga erërat e forta.
Agjencia spanjolle e motit, AEMET, tha se kushtet e vështira do të vazhdojnë edhe të shtunën.
Edhe Valencia, në Spanjë, u godit nga stuhitë dhe erërat e forta, ndërsa lumenj balte mbushën rrugët.
