Foto: Ministria e Ekologjisë, Zhvillimit të Qëndrueshëm dhe Zhvillimit të Veriut / Ministarstvo ekologije, održivog razvoja i razvoja sjevera
Në kuadër të fushatës kombëtare “Ruaje që të të ruajë”, të mbështetur nga Delegacioni i Bashkimit Evropian në Mal të Zi dhe Ministria e Ekologjisë, Zhvillimit të Qëndrueshëm dhe Zhvillimit të Veriut, sot janë zhvilluar aksione të organizuara për pastrimin e mbeturinave në Komunën e Tuzit dhe përgjatë aksit rrugor Tuz–Podgoricë.
Në aktivitetet e zhvilluara në Tuz morën pjesë përfaqësues të institucioneve lokale dhe shtetërore, zyrtarë të Bashkimit Evropian në Mal të Zi, organizata joqeveritare të fushës së mbrojtjes së mjedisit, si dhe përfaqësues të ndërmarrjeve publike dhe kompanive që veprojnë në këtë sektor.
Gjatë këtij aksioni, është theksuar se aksione të tilla për pastrimin e mjedisit kanë një rëndësi të veçantë, pasi kontribuojnë drejtpërdrejt në përmirësimin e gjendjes ekologjike dhe në rritjen e cilësisë së jetës së qytetarëve.
Pjesëmarrësit kanë vlerësuar se bashkëpunimi mes institucioneve, organizatave dhe komunitetit është kyç për rezultate të qëndrueshme në mbrojtjen e mjedisit.
Gjithashtu është nënvizuar se vetëdija ekologjike po rritet gradualisht, por kërkohet angazhim i vazhdueshëm për të kaluar nga ndërgjegjësimi në veprime konkrete në terren.
Në këtë kontekst, është theksuar edhe nevoja për zbatim më efikas të rregullave dhe forcim të politikave mjedisore.
Në fund, është apeluar që iniciativa të tilla të vazhdojnë edhe në të ardhmen, me qëllim krijimin e një mjedisi më të pastër, më të sigurt dhe më të qëndrueshëm për të gjithë qytetarët.
