Muzeu i famshëm i Luvrit në Paris është mbyllur përkohësisht pas një grabitjeje të ndodhur mëngjesin e së dielës. Tre persona të maskuar kanë hyrë me forcë në muze dhe janë larguar me nëntë bizhuteri të çmuara nga Galeria Apollo.
Ministrja e Kulturës së Francës, Rachida Dati, konfirmoi grabitjen përmes një postimi në rrjetet sociale, duke theksuar se nuk ka persona të lënduar dhe se hetimet janë duke vazhduar.
Sipas autoriteteve, grabitësit përdorën një ashensor mallrash për të hyrë në galeri dhe përdorën pajisje elektrike për të thyer mbrojtjen e ekspozitës. Ata janë arratisur nga vendi i ngjarjes me një skuter.
Galeria Apollo strehon disa nga objektet më të çmuara të artit dhe bizhuterive të koleksionit mbretëror francez. Ajo ishte rihapur për publikun në janar të vitit 2020, pas punimeve restauruese.
Muzeu i Luvrit, i njohur në mbarë botën për kryeveprat e tij, përfshirë “Mona Lisën”, mbetet një nga atraksionet më të mëdha kulturore në Francë, me mbi 30 mijë vizitorë në ditë.
Autoritetet franceze janë në kërkim të autorëve dhe po shqyrtojnë pamjet nga kamerat e sigurisë për të identifikuar personat e përfshirë në grabitje.
