Kuvendi i Serbisë zgjodhi sot Qeverinë e re serbe. Bashkë me kryeministrin e ri Millosh Vuçeviq, janë betuar 31 anëtarë të Qeverisë. Kryeministri Millosh Vuçeviq tha se qeveria e tij do të vazhdojë rrugën e neutralitetit. Deputeti i vetëm shqiptar në kuvendin serb, Shaip Kamberi, nuk pret ndryshim të politikave serbe ndaj shqiptarëve
Qeveria e re serbe dha betimin, ndërsa kryeministri Millosh Vuçeviq tha se qeveria e re do të vazhdojë në rrugën e neutralitetit ushtarak dhe politik. Deputetët e partive në pushtet vlerësuan se e përkrahin kabinetin e ri sepse do të vazhdohet politika e përcaktuar nga presidenti i Serbisë, Aleksandër Vuçiq.
Nga ana tjetër, partitë opozitare kanë vlerësuar se nuk ka rëndësi se kush e përbën Qeverinë e Serbisë pasi, siç thonë ata, vendimet në Serbi i merr një njeri.
“Kjo qeveri nuk është as pro-ruse, as pro-evropiane, as pro-serbe, është një qeveri pro-Vuçiq. I vetmi kriter me të cilin ai zgjodhi personat për ministra është besnikëria ndaj tij. Dhe çka të thuhet kur faqja e fundit e programit qeveritar prej 65 faqesh i referohet luftës kundër krimit dhe korrupsionit. Dhe të gjithë e dinë shumë mirë që sot Serbia është kampione për nga niveli i krimit në Evropë”, tha Dragana Rakiq nga Partia Demokratike.
Deputeti shqiptar Shaip Kamberi, në seancën e Kuvendit theksoi se pozita e pakicës kombëtare shqiptare është e keqe, duke shprehur dyshimin se politika e qeverise së re do të ndryshohet.
Kryeministri i ri Millosh Vuçeviq, duke prezantuar programin e tij para deputetëve, tha se anëtarësimi në Bashkimin Evropian mbetet synim strategjik, por se Serbia është e rënduar nga kriteret e reja politike.
