Kryeministri i Malit të Zi, Dritan Abazoviq, ka bërë të ditur se në Mal të Zi ka mbërritur një nga markat kryesore të hoteleve – Hyatt dhe shtoi se do të hapen 150 vende të reja të punës. Kryeministri Abazoviq tha se është një nder i madh që Hyatt po vjen në Mal të Zi dhe shpreson që ky të jetë vetëm hoteli i tyre i parë, i cili do të hapet në Mal të Zi në të ardhmen. Abazoviq tha se Hyatt nuk mund të kishte zgjedhur një vend më të bukur se Bokën e Kotorrit. “Ky është vetëm fillimi i një ndryshimi të madh të Bokës së Kotorrit për mirë. Këtu në Kotorr, por edhe në vende të tjera në Bokë, së shpejti do të hapen hotele të tjera me karakteristika ndërkombëtare”, ka thënë Abazoviq. Ai tha se Mali i Zi duhet të arrijë trendet e botës moderne dhe shtoi se globalizimi nuk njeh kufij. “Vendi ynë është unik, por nuk mund të realizojë potencialin e tij të plotë nëse nuk është pjesë e një historie më të gjerë globale. Jam i sigurt se kompanitë amerikane do të japin një kontribut të rëndësishëm për këtë”, theksoi Abazoviq dhe shtoi se të gjithë investitorët janë të mirëpritur dhe se Qeveria dhe komunat do tu dalin në ndihmë. Abazoviq theksoi se kjo dërgoi një mesazh se për Malin e Zi mund të bëhen gjëra të mëdha në një periudhë të shkurtër kohore. “Jam i sigurt se Mali i Zi do të gjejë rrugën e tij për të promovuar veten si një destinacion jashtëzakonisht unik. Se mysafirët e Hyatt në Bokën e Kotorrit do të jenë shumë të kënaqur. Se Hyatt do të jetë i kënaqur me partnerët e tij në Mal të Zi. Se do të na promovojë në të gjithë planetin dhe se do të jetë një motiv për markat e tjera të mëdha të hoteleve që të vijnë në tregun tonë. Jam i sigurt se po bëjmë një garë ku do të jetë e rëndësishme të arrijmë përpara një marke tjetër. Ky është Mali i Zi për të cilin ne përpiqemi dhe nuk duhet të kemi frikë nga cilësia”, tha Abazoviq, duke shtuar se jemi unikë dhe kështu duhet të sillemi.
