Unë mbështes fuqishëm një Mal të Zi multietnik, multikonfesional dhe multikulturor, tolerant dhe të përkushtuar ndaj vlerave evropiane dhe besoj se duke përshpejtuar zbatimin e detyrimeve nga agjenda evropiane, ai do të forcojë pozicionin e tij si anëtari i parë i ardhshëm i BE-së, tha ministri i të Drejtave të Njeriut dhe të Pakicave Fatmir Gjeka në një bisedë me ambasadoren e Shteteve të Bashkuara të Amerikës në Mal të Zi, Xhudi Rajzing Rajnke.
Gjeka e njoftoi ambasadoren Rajnke për nivelin e realizimit të obligimeve të Ministrisë, aktivitetet në të cilat po punon dhe sfidat që ka përpara.
“Ne kemi më së shumti obligime në periudhën e ardhshme në kornizën normative, jemi duke punuar në dy strategji të reja dhe në zbatimin më të mirë të obligimeve të mbetura, pasi që pjesa më e madhe e vitit paraprak është kaluar në mandatin teknik të Qeverisë”, tha Gjeka.
Ai shtoi se tani janë duke u fokusuar në miratimin e Ligjit për mbrojtjen e barazisë dhe ndalimin e diskriminimit dhe themelimin e Drejtorisë për mbrojtjen e të drejtave të personave me aftësi të kufizuara.
Rajnke theksoi rëndësinë e ruajtjes së rrugës evropiane të Malit të Zi.
Në bisedën me ministrin, ajo ritheksoi përkushtimin e Shteteve të Bashkuara të Amerikës për të mbështetur synimet strategjike të Malit të Zi që janë në përputhje me agjendën evropiane dhe euroatlantike, duke pasur parasysh se Mali i Zi është anëtar i NATO-s dhe kandidat serioz për anëtarësim në Bashkimin Evropian.
“Shtetet e Bashkuara të Amerikës do të vazhdojnë të monitorojnë zbatimin e politikave në fushën e mbrojtjes së të drejtave dhe lirive të njeriut”, tha ambasadorja, duke theksuar rëndësinë e bashkëpunimit me sektorin civil dhe komunikimit të mirë të politikave strategjike me qëllim realizimin e aktiviteteve për zbatimin e tyre.
Bashkëbiseduesit konstatuan se bashkëpunimi i ngushtë dhe i vazhdueshëm me sektorin civil dhe partnerët ndërkombëtarë është i domosdoshëm në mënyrë që realizimi i qëllimeve strategjike të jetë i suksesshëm, por mbi të gjitha veprimi i Malit të Zi në përputhje me vlerat evropiane.
