Në disa shkolla në veri të vendit sot nuk ka ngrohje për shkak se ka pasur problem gjatë procedurave tenderuese për blerjen e naftës, tha në Kuvend ministri i Financave Aleksandar Damjanoviq dhe shtoi se në komunikim do të kërkojë nga institucionet tjera që urgjentisht ta zgjidhin këtë problem. Sipas Damjanoviqit, problemi me furnizimin me karburant ka ardhur për shkak të problemeve në procedurën e tenderit. “Gjatë procedurës së tenderit ka ndodhur një problem nga ana e një ofruesi”, tha Damjanoviq dhe shtoi se opsioni i vetëm ishte shkelja e ligjit gjatë prokurimit. Në apelin e deputetëve se është e nevojshme ndryshimi i Ligjit për prokurim publik, Damjanoviq tha se akti është para deputetëve. “Duhet të kërkojmë një mënyrë për të bërë përjashtime për disa gjëra të tilla… Unë do të bëj një komunikim që kjo të zgjidhet urgjentisht”, tha ministri i Financave. Më herët, deputetët e Demokratëve dhe Frontit Demokratik, Vladimir Martinoviq dhe Slaven Radunoviq, kanë bërë thirrje që problemi me ngrohjen në shkollat në veri të zgjidhet sa më shpejt. Nga dje nuk ka ngrohje në shkollat në Kollashin, të cilat ngrohen nga kaldaja e shkollës fillore “Risto Manojloviq”, dhe orët e mësimit janë shkurtuar në 30 minuta, tha drejtoresha e asaj shkolle, Natasha Pekoviq, për Portalin e RTMZ. Ata presin që problemi të zgjidhet sot ose nesër kur pritet të sigurohet një sasi e caktuar karburanti nga Ministria e Arsimit.
