Organizata e Kombeve të Bashkuara (OKB) ka paralajmëruar se fenomeni klimatik El Ninjo mund të arrijë përmasa të paprecedenta, duke shkaktuar temperatura ekstreme, përmbytje dhe thatësira në shumë pjesë të botës.
Sipas Organizatës Botërore Meteorologjike, fenomeni pritet të arrijë kulmin në dhjetor, ndërsa pasojat për njerëzit mund të vazhdojnë deri në vitin 2027 dhe më tej.
Zyrtarët e OKB-së u kanë bërë thirrje shteteve që të ndërmarrin masa urgjente parandaluese për të mbrojtur miliona njerëz të ekspozuar ndaj rreziqeve klimatike.
Drejtuesja e Organizatës Botërore Meteorologjike, Celeste Saulo, tha se El Ninjo aktual mund të jetë i paprecedentë për nga fuqia, duke tejkaluar nivelet e regjistruara gjatë katër dekadave të fundit. Ajo paralajmëroi se ngjarjet ekstreme të motit pritet të shtohen dhe të shkaktojnë pasoja zinxhirore.
Ndërkohë, shefi i ndihmave humanitare të OKB-së, Tom Fletcher, tha se fenomeni mund të shkaktojë pasoja të rënda në Amerikën Latine, Afrikën Lindore dhe Jugore, Azi dhe rajonin e Paqësorit. Ai paralajmëroi se rreth 50 milionë njerëz mund të përballen me uri, ndërsa rritja e çmimeve të ushqimeve, karburanteve dhe plehrave kimike mund ta përkeqësojë më tej situatën. Fletcher theksoi se pasojat e El Ninjos mund të ndihen për muaj të tërë, madje edhe për vite, duke nxitur kriza humanitare, konflikte dhe zhvendosje të popullsisë. Ai u bëri thirrje qeverive, bankave për zhvillim dhe institucioneve financiare ndërkombëtare që të sigurojnë fonde përpara se të shkaktohen dëme të mëdha.
Sipas parashikimit të OKB-së, temperaturat e sipërfaqes së detit në Paqësorin tropikal mund të rriten deri në 3.8 gradë Celsius mbi mesataren gjatë periudhës nëntor-janar, duke shtuar efektet e ndryshimeve klimatike të shkaktuara nga aktiviteti njerëzor.
El Ninjo ka shkaktuar tashmë dëme në disa rajone, përfshirë Amerikën Qendrore, ku thatësira po shkatërron të mbjellat dhe po shkakton ngordhjen e kafshëve.
