Foto: AA
Organizata Botërore e Shëndetësisë (OBSH) tha sot se objektivi është dërgimi i 500-600 kamionëve me ndihma në Gaza në ditë pasi të hyjë në fuqi armëpushimi.
“Procesi kyç fillon të dielën, dhe OKB-ja dhe një pjesë e jona (OBSH) po planifikojnë t’i japin përparësi sa më shumë që të jetë e mundur. Objektivi është të sigurojmë nga 500 deri në 600 kamionë në ditë gjatë javëve të ardhshme…Kjo do të jetë një rritje e madhe nga 40-50 që kemi parë gjatë muajit të fundit”, tha Richard Peeperkorn, përfaqësues i OBSH-së për Bregun Perëndimor dhe Gazën, në përgjigje të një pyetjeje nga Anadolu.
Duke theksuar se një rritje e tillë do të ishte “e madhe”, Peeperkorn tha se OBSH-ja do të përpiqet të bëjë më të mirën në nivelin e saj për të siguruar artikujt me përparësi “sa më shpejt të jetë e mundur”.
Ai shprehu shpresën që procesi të zgjerohet në mënyrë që me hapjen e pikave të mbyllura kufitare të sillen mallra në veri dhe jug të Gazës.
Zëdhënësi shprehu gjithashtu shqetësim për situatën e sigurisë në enklavën e rrethuar, duke thënë se ajo duhet të trajtohet.
Prioritetet kryesore do të jenë ushqimi, uji, furnizimet mjekësore, karburantet, si dhe pjesët e riparimit të gjeneratorëve për spitalet, tha ai.
Në një pyetje vijuese nëse ka ndodhur ndonjë ndryshim në rrjedhën e ndihmës dhe misionet e OBSH-së që nga shpallja e marrëveshjes së armëpushimit, ai u përgjigj se situata është “e njëjtë”.
“Aktualisht, ndihma që shkon në Gaza ka qenë e ngadaltë”, tha ai, duke kërkuar që ajo “duhet patjetër” të ndryshojë gjatë javëve të ardhshme.
