Në 10 vjet, më shumë se 74.000 banorë u larguan nga Mali i Zi dhe trendi i emigrimit vazhdoi edhe në vitin 2022, kur sipas të dhënave të Shoqatës së Statisticienëve dhe Demografëve të Malit të Zi emigruan mbi 1.900 persona.
Mirëpo, sipas Gordana Radojeviq, një numër i madh i njerëzve kanë ardhur në Mal të Zi, kryesisht për shkak të migrimit të detyruar, sidomos në dy vitet e fundit, kështu që mund të ndodhë që pas regjistrimit të popullsisë në nëntor të kemi 700 mijë banorë.
Radojeviq nga Shoqata e Statisticienëve dhe Demografëve në programin e mëngjesit të TVMZ thotë se në Mal të Zi në 10 vitet e fundit janë vendosur 66.000 persona, kryesisht qytetarë të Rusisë, Ukrainës dhe Turqisë.
“Bëhet fjalë kryesisht për migrimin e detyruar dhe mund të pritet që kjo popullatë të largohet për të jetuar këtu. Nëse në regjistrimin e ardhshëm të nëntorit ua hapin derën regjistruesve tanë dhe deklarojnë se duan të vazhdojnë të jetojnë në Mal të Zi, mund të arrijmë deri në 700.000 banorë, pa dallim shtetësie, prejardhjeje, kombësie. Duke pasur parasysh se ne kemi rreth 100,000 refugjatë për momentin, hipotetikisht kjo situatë do të ndryshojë madhësinë dhe strukturën e përgjithshme të popullsisë sonë”, shpjegon Radojeviq.
Ajo thekson se trendi i emigrimit dhe rënia e natalitetit tregojnë se Mali i Zi po hyn ngadalë në zonën e shpopullimit. Numri i banorëve, siç thotë ajo, është rritur pak deri në vitin 2018, por më pas kemi një trend negativ, i cili ishte veçanërisht i theksuar gjatë pandemisë në vitin 2021.
“Në këtë trend ndikojnë disa faktorë, ekonomia është një prej tyre, por nuk është vendimtare, sepse edhe vendet më të mëdha të Europës, si Gjermania, kanë në rënie natalitetin. Është fakt se tek ne ky faktor ndikon dukshëm në zvogëlimin e popullsisë”, tha Radojeviq.
