Të shtunën në Kalanë e Ulqinit është bërë promovimi i projektit për digjitalizimin e gjuhës shqipe në Malin e Zi, përmes softuerit Kulla e shqipes, për të gjithë banorët e Malit të Zi.
Bartëse e këtij projekti është Ministria e të Drejtave të Njeriut dhe Pakicave në bashkëpunim me kompaninë Albasoft që është përgjegjëse për zbatimin e projektit.
Sipas fjalëve të ministrit Fatmir Gjeka, pjesë e këtij digjitalizimi janë:
– Fjalori i madh drejtshkrimor i gjuhës shqipe në formatin digjital, me mbi 300 mijë faqe A4, me mbi 8.000.000 forma morfologjike;
– Fjalori i madh shpjegues i gjuhës shqipe me mbi 80.000 fjalë dhe shprehje;
– Fjalori sinonimik dhe antonimik;
– Softueri për korrigjimin e gabimeve drejtshkrimore në MS Word;
– Softueri për korrigjimin e gabimeve sintaksore;
– Softueri për mësimin e gjuhës shqipe etj.
„Nga aspekti i zhvillimit të politikave publike në kuadër të mbrojtjes dhe përmirësimit të të drejtave të njeriut të pakicave kombëtare dhe komuniteteve të tjera pakicë, rol kyç ka Ministria e të Drejtave të Njeriut dhe Pakicave,“ tha ministri Gjeka.
Ai shtoi që nga kjo marrëveshje përfitojnë të gjithë banorët e Malit të Zi, duke përdorur falas softuerin Kulla e shqipes brenda dhe jashtë vendit. Gjithashtu do të përdoret edhe nga punëtorët e institucioneve të Malit të Zi, qeveritare dhe joqeveritare, punëtor në ndërmarrjet private dhe publike të Malit të Zi, si dhe të gjithë ata që kanë shtetësinë e Malit të Zi.
Disa nga avantazhet kryesore të zbatimit të këtij projekti, përveç përmbushjes së detyrimeve nga Karta Evropiane për Gjuhët Rajonale dhe të Pakicave janë:
– Një vend shumëgjuhësh ofron një mundësi unike për të ruajtur kulturat dhe traditat e ndryshme;
– Shumëgjuhësia është një avantazh për ekonominë e vendit tonë, sepse tërheqë kompani ndërkombëtare dhe turistë që flasin gjuhë të ndryshme;
– Përmirësimi i komunikimit me vendet e tjera përreth do të ndihmojë marrëdhëniet ndërkombëtare, tregtinë dhe diplomacinë;
– Gjithashtu, zbatimi i projektit do të zvogëlojë barrierat e komunikimit, sfidat në arsim dhe pengon asimilimin kulturor.
Për mbështetjen e këtij projekti të rëndësishëm për shqiptarët në Mal të Zi është falënderuar kryeministrin Dritan Abazoviq të cilit u dha një mirënjohje, e cila është dorëzuar perfaqësuesit të Qeverisë Ilir Harasanit. Mirënjohje fituan edhe ministri Gjeka dhe drejtori në Ministri Arben Xhurreta.
