Qeveria e re malazeze duhet të jetë përgjegjëse për qëllimet e veta, tha Ambasada e Shteteve të Bashkuara të Amerikës (SHBA), duke shtuar se ata janë të shqetësuar se partitë që historikisht nuk i mbështesin ato synime mund të pengojnë përparimin e vendit.
Ambasada tha se me marrjen e sotme të detyrës nga Qeveria e re, SHBA-të vazhdojnë të mbështesin shtetin dhe qytetarët e Malit të Zi në procesin e përparimit drejt anëtarësimit në Bashkimin Evropian (BE) dhe ruajtjen e vlerave euroatlantike.
Siç shtuan ata, Qeveria e re malazeze duhet të jetë përgjegjëse për qëllimet e veta të përcaktuara – anëtarësimi i plotë në BE, anëtarësimi aktiv dhe i besueshëm në NATO, përmirësimi i marrëdhënieve të fqinjësisë së mirë dhe forcimi i rolit të shtetit në organizatat shumëpalëshe.
“Si aleat i NATO-s, ne jemi të shqetësuar se partitë që historikisht nuk i mbështesin këto synime mund të pengojnë përparimin e Malit të Zi. Ne bëjmë thirrje për kujdes për të siguruar që Mali i Zi të përfitojë nga kjo mundësi historike për të realizuar potencialin e tij të plotë demokratik dhe ekonomik”, thuhet në deklaratë.
Siç shtohet, SHBA shpreson të shohë qeverinë e sapoformuar të bëjë përparim të shpejtë në përmbushjen e detyrimeve të saj, duke avancuar vendin në rrugën e tij drejt anëtarësimit në BE dhe duke mbetur një aleat i fortë në NAT
Nga Ambasada theksuan se do të mbështesin dhe njohin veprimet konstruktive të Kuvendit të ri dhe të Qeverisë, por edhe të shprehin shqetësimin e tyre për aktivitetet që bien ndesh me vlerat euroatlantike dhe që pengojnë progresin e prekshëm drejt integrimit në BE.
„Pritshmëritë janë të mëdha dhe presim që ato mund dhe do të realizohen”, përfundon deklarata e Ambasadës së SHBA-së në Mal të Zi.
