Parlamenti i Ukrainës miratoi të enjten një projektligj të ri që zëvendëson një ligj të mëparshëm që kufizonte pushtetet e organeve anti-korrupsion dhe shkaktoi protesta masive, më të mëdha që nga fillimi i pushtimit rus mbi tre vjet më parë.
Vota u transmetua drejtpërdrejt nga parlamenti dhe projektligji, i miratuar më parë nga organet anti-korrupsion, parashikon testime të rregullta me makinën e të vërtetës për zyrtarët e kësaj fushe.
Ndërsa aleatët evropianë të Ukrainës shprehën shqetësim se ligji i mëparshëm minonte reformat kundër korrupsionit – të cilat janë thelbësore për aspiratat e vendit për t’u anëtarësuar në BE – ata mirëpritën ndryshimet e reja.
Andriy Yermak, kreu i zyrës së presidentit Zelensky, përshëndeti vendimin e parlamentit dhe falënderoi protestuesit që kundërshtuan ligjin e mëparshëm, duke e cilësuar këtë fitore për Ukrainën demokratike.
Kryeministrja Yulia Sviridenko deklaroi se ligji i ri “eliminon rrezikun e ndërhyrjes në punën e organeve kundër korrupsionit dhe forcon sistemin e zbatimit të ligjit”, duke theksuar se kjo përgjigjet pritshmërive të shoqërisë dhe partnerëve evropianë.
Para votimit, dhjetëra protestues mblidheshin përpara parlamentit dhe pallatit presidencial për të kërkuar miratimin e projektligjit.
Ligji pritet të nënshkruhet së shpejti nga Presidenti Volodymyr Zelensky, duke përmbyllur kështu procesin ligjor. Ligji i mëparshëm kishte vendosur Byronë Kombëtare Kundër Korrupsionit dhe Zyrën e Prokurorit të Specializuar Kundër Korrupsionit nën kontrollin e prokurorit të përgjithshëm, i cili emërohet nga presidenti, gjë që kishte shkaktuar shqetësime për ndërhyrje politike në hetimet kundër korrupsionit dhe nxiti protesta të gjata.
