Foto: Qeveria e Malit të Zi / Vlada Crne Gore
Kryeministri i Malit të Zi Millojko Spajiq i bëri thirrje Kuvendit që sa më shpejt të miratojë buxhetin për vitin e ardhshëm, në mënyrë që pensionet e rritura të paguhen në shkurt.
Në një intervistë për Televizionin e Malit të Zi, Spajiq kërkoi nga Kuvendi që në dhjetor të miratojë buxhetin për hir të qytetarëve, për hir të pensionistëve, nëse është e mundur.
Ai tregoi se pensionet e dhjetorit, të cilat janë afërsisht në të njëjtin nivel, do të paguhen në janar.
“Megjithatë, duke filluar nga muaji shkurt, ose më saktë, me pensionet e janarit që paguhen në shkurt, potencialisht do të kemi problem që buxheti të mos jetë aq i madh për të paguar pensionet, për të paguar pensionet e rritura dhe për të paguar pensionet proporcionale që kemi premtuar”, tha Spajiq.
Ai përkujtoi se kanë premtuar se nga 1 janari i vitit të ardhshëm të gjithë qytetarët që marrin pension proporcional do të kenë pension minimal prej 450 euro.
“Dhe kjo është diçka për të cilën jemi përkushtuar. Ne do ta përmbushim atë, por buxheti duhet të vijojë”, tha Spajiq.
Ai paralajmëroi seriozitetin e situatës, sepse financimi i përkohshëm nënkupton që 1/2 e buxhetit të këtij viti të ndahet për buxhetet mujore në vitin e ardhshëm.
“Prandaj, mendoj se nuk do të ketë para të mjaftueshme në shkurt dhe për këtë do të kërkoja nga Kuvendi që ta miratojë atë për hir të qytetarëve tanë, për hir të pensionistëve, nëse është e mundur në dhjetor”, tha Spajiq.
Siç tha ai, ky do të ishte një mesazh shumë i bukur jo vetëm për qytetarët, por edhe për investitorët ndërkombëtarë, se shteti thjesht funksionon normalisht dhe se askush nuk është më i fortë se shteti.
Spajiq theksoi se opozita nuk mund të bllokojë punën e institucioneve shtetërore.
