Investimi në të rinjtë është në fakt një investim thelbësor në të ardhmen e Malit të Zi dhe të rinjtë tanë meritojnë mundësi për t’u zhvilluar, dhe sporti, si një nga mjetet më të fuqishme dhe më të pastra, ua mundëson ta bëjnë këtë.
Këtë e tha ministri i Sportit dhe Rinisë Dragosllav Shqekiq në panelin “Bashkëpunimi rajonal përmes sportit” i mbajtur në Shkup.
“Ministria ofron mbështetje konkrete përmes një sërë programesh dhe nismash që nxisin aktivitetin sportiv tek të rinjtë, por edhe përmes investimeve në infrastrukturën që u mundëson fëmijëve dhe të rinjve tanë, nga shkollat fillore dhe adhuruesit e sporteve rekreative e deri te sportistët profesionistë, ta praktikojnë këtë disiplinë të bukur në kushtet më të mira të mundshme”, tha Shqekiq.
Ai vlerësoi se “bashkëpunimi me organizata si RYCO dhe ERASMUS+ na mundësoi të lidhim të rinjtë nga Mali i Zi me të rinjtë në të gjithë rajonin”.
Ai theksoi se “qëllimi ynë kryesor është krijimi i mundësive të barabarta për të gjithë” dhe shtoi se investimi në infrastrukturën sportive, në fusha për të cilat më parë nuk ka pasur ndjeshmëri, duhet të jetë një nga prioritetet.
“Qëllimi ynë është që përmes sportit të krijojmë breza të rinjsh që do të jenë ambasadorë të paqes, bashkëpunimit dhe miqësisë, jo vetëm në Mal të Zi, por në të gjithë Ballkanin Perëndimor”, tha ministri.
