Foto: Qeveria e Malit të Zi / Vlada Crne Gore
Ministri i Administratës Publike, Marash Dukaj, tha se çështjen e reformës së administratës publike e kemi ngritur në nivelin më të lartë dhe më urgjent të prioriteteve, dhe për më pak se tetë muaj, Ministria ka përfunduar të gjitha detyrimet nga Agjenda e Reformave që ishin të planifikuara për gjithë vitin.
“Ne kemi zgjedhur drejtimin. Çështja është vetëm sa kohë na duhet që të arrijmë në qëllim dhe të bëhemi anëtari i plotë i familjes demokratike të vendeve të Bashkimit Evropian. Takimin e sotëm e shoh si një pjesë tjetër të mozaikut të veprimit tonë partner dhe miqësor,” tha Dukaj sot në Takimin Koordinues të Donatorëve.
Në këtë takim u prezantuan rezultatet e Ministrisë së Administratës Publike nga periudha e kaluar, si dhe fushat për të cilat nevojitet mbështetja e donatorëve dhe partnerëve relevantë për përmirësim.
Takimin e hapi Dukaj, i cili falënderoi përfaqësuesit e korit diplomatik dhe partnerët ndërkombëtarë, duke theksuar rëndësinë e bashkëpunimit partner në drejtim të arritjes së qëllimeve që na afrojnë me anëtarësimin në Bashkimin Evropian.
Ai theksoi se miqtë dhe partnerët ndërkombëtarë ndjekin me kujdes punën e Ministrisë së Administratës Publike dhe mbështesin arritjen e qëllimeve sfiduese.
“Çështjen e reformës së administratës publike e kemi ngritur në nivelin më të lartë dhe më urgjent të prioriteteve, dhe për më pak se tetë muaj, Ministria ka përfunduar të gjitha detyrimet nga Agjenda e Reformave që ishin planifikuar për gjithë vitin, duke konfirmuar kështu përkushtimin ndaj procesit të reformës dhe duke krijuar kushtet për përdorimin e mekanizmave të mbështetjes së BE-së,” tha Dukaj.
Drejtoresha e Përgjithshme, Marija Hajdukoviq, prezantoi rezultatet që ka arritur Ministria, por edhe sfidat reale me të cilat përballet, kryesisht në fushën e kapaciteteve administrative, koordinimit dhe transformimit digjital. Ajo theksoi se mbështetja e donatorëve që partnerët ndërkombëtarë ofrojnë tashmë po jep rezultate dhe pret vazhdimin e bashkëpunimit për t’u përgjigjur sfidave në procesin e anëtarësimit në BE.
