Foto: Kuvendi i Malit të Zi / Skupština Crne Gore
Sot në Kuvendin e Malit të Zi ka pasur debat të ashpër gjatë diskutimit për disa ligje të rëndësishme që lidhen me sistemin gjyqësor.
Ministri i Drejtësisë, Bojan Bozhoviq, deklaroi se punonjësit e drejtësisë punojnë në kushte të papërshtatshme dhe njoftoi rritje prej 30% të kompensimeve për gjyqtarët dhe prokurorët.
Ai theksoi efikasitetin e lartë të Gjykatës së Lartë, me normë prej 118.2%.
Deputeti Andrija Nikoliq (PDS) kritikoi ministrin Bozhoviq për heshtjen ndaj propozimeve që, sipas tij, cënojnë të drejtat e njeriut, duke përmendur edhe projektligjin për Agjencinë e Sigurisë Kombëtare. Ai akuzoi shumicën parlamentare për veprime kundër interesave të qytetarëve dhe të drejtave demokratike.
Deputeti, Millan Knezheviq, deklaroi se nuk do të mbështesë rritjen e pagave për disa gjyqtarë të cilët, sipas tij, kanë vepruar politikisht dhe në dëm të opozitës. Ai kritikoi Nikoliqin për mungesë koherence, duke theksuar se PDS nuk ka të drejtë të kritikojë pas asaj që ka bërë në të kaluarën.
Nikoliq iu kundërpërgjigj duke e akuzuar Knezheviqin se ka bashkëpunuar me një shtet tjetër kundër interesave të Malit të Zi.
Ministri Bozhoviq i mohoi akuzat për ndërhyrje në pavarësinë e gjyqësorit dhe theksoi se çdo akt juridik do të jetë në përputhje me standardet ndërkombëtare. Ai gjithashtu mohoi pretendimet për përpjekje për privatizim të gjyqësorit.
Deputeti Jovan Vuçuroviq tha se ndonëse rritja e pagave mund të jetë e nevojshme, problemi i vërtetë qëndron në mungesën e rezultateve nga ana e gjyqësorit dhe prokurorisë në luftën kundër krimit.
Në rendin e ditës ishin një sërë projektligjesh, përfshirë:
- Ndryshimet në ligjet për Këshillin Gjyqësor dhe gjyqtarët
- Prokurorinë Shtetërore
- Gjykatën Kushtetuese
- Legalizimin e objekteve pa leje
- Ndërtimin, transportin hekurudhor, marrëdhëniet pronësore në transportin ajror
- Pyjet dhe taksën mbi fitimin e ndërmarrjeve.
