Foto: AP
Për Bashkimin Evropian, do të ishte një dështim nëse nuk do të prezantonte asnjë anëtar të ri gjatë Komisionit aktual Evropian, tha Komisionerja e Zgjerimit e Bashkimit Evropian, Marta Kos, në një intervistë për Radion Evropa e Lirë.
Ajo tha se është e sigurt se kjo mund të bëhet me Malin e Zi.
“Të gjithë kapitujt janë të hapur, kështu që po i mbyllim ato në mënyrë që ta përfundojmë procesin në fund të vitit 2026 nga një këndvështrim teknik”, tha Kos.
Ajo deklaroi se edhe kur ishte kandidate për komisionere, tha se zgjerimi i sotëm është i ndryshëm nga ai i pesë viteve më parë.
“Megjithatë, sot them se procesi i zgjerimit është i ndryshëm nga ai që ishte në janar, sepse shumë gjëra kanë ndryshuar, përfshirë qeverinë e re të Shteteve të Bashkuara të Amerikës (SHBA). Gjeopolitika ka ndryshuar në kuptimin që ishte një përparësi para zgjerimit, por nuk ishte aq e lidhur me pjesën që lidhet me sigurinë dhe paqen. Dhe përsëri, disi me zgjerimin e sotëm, po kthehemi te bazat e themelimit të BE-së”, tha Kos.
Ajo shtoi se kjo ishte për hir të sigurimit të paqes, lirisë, prosperitetit dhe se sot mund të shtohet edhe për hir të mbrojtjes.
“Kjo është ajo që po bëjmë në të vërtetë në të gjithë procesin. Sigurisht, bëhet fjalë ende për kapituj, grupe dhe standarde, por kjo është shumë më e rëndësishme në kuptimin që nëse dështojmë në këtë, në fakt, do ta them kështu, nuk duhet të dështojmë. Pra, sot është shumë e rëndësishme që të mos dështojmë në procesin e zgjerimit, i cili është politika e jashtme më e suksesshme e BE-së.“
