Kryeministri i Malit të Zi, Zdravko Krivokapiq, tha se pasoja e krizës COVID-19 është një shtresim shoqëror edhe më i madh, prandaj Qeveria planifikon të formojë një Fond të Drejtësisë Sociale në një të ardhme të afërt. Krivokapiq u takua sot me të sapoemëruarin Koordinatorin e Kombeve të Bashkuara në Mal të Zi, Peter Lundberg. Krivokapiq e njoftoi Lundberg me situatën aktuale në Mal të Zi, si dhe problemet e shkaktuara nga pandemia COVID-19 në sistemin shëndetësor dhe ekonominë, në të cilën turizmi është dega kryesore ekonomike. Ai gjithashtu vuri në dukje se një nga angazhimet kryesore të qeverisë është që Mali i Zi të bëhet një shoqëri me shanse të barabarta. Koordinatori i KB shprehu vlerësimin për kontributin e vazhdueshëm të Malit të Zi në Agjendën e Zhvillimit të Qëndrueshëm dhe shprehu kënaqësinë me emërimin në krye të ekipit të KB në një vend i njohur si një shembull i bashkëpunimit të mirë me KB, e cila ka demonstruar angazhimin e saj për paqe dhe siguri, zhvillimin dhe mbrojtjen e të drejtave të njeriut si vlera themelore të Kartës së Kombeve të Bashkuara. Lundberg theksoi vendosmërinë e Kombeve të Bashkuara për të vazhduar mbështetjen e vendit në arritjen e përparësive kombëtare, me një fokus në rimëkëmbjen nga pandemia.
