Foto: Reuters
Administrata e Presidentit amerikan Joe Biden po përgatit një paketë armësh prej 725 milionë dollarësh për Ukrainën, thanë të mërkurën dy zyrtarë amerikanë, ndërsa presidenti në largim kërkon të forcojë qeverinë në Kiev përpara se të largohet nga detyra në janar.
Sipas një zyrtari të njohur me planin, administrata Biden planifikon të sigurojë një sërë armësh antitank nga rezervat amerikane për të mposhtur trupat ruse në avancim, duke përfshirë minat tokësore, dronët, raketat Stinger dhe municionet për sistemet raketore të artilerisë me lëvizshmëri të lartë, HIMARS.
Paketa pritet të përfshijë gjithashtu municione thërrmuese, të cilat zakonisht gjenden në raketat GMLRS, të lëshuara nga sistemet HIMARS, sipas njoftimit, të parë nga Reuters.
Njoftimi zyrtar në Kongres për paketën e armëve mund të vijë që të hënën, tha një zyrtar. Përmbajtja dhe madhësia e paketës mund të ndryshojë në ditët në vijim përpara nënshkrimit të pritshëm të Bidenit.
Shtetet e Bashkuara nuk kanë eksportuar mina tokësore për dekada dhe përdorimi i tyre është i diskutueshëm për shkak të dëmit të mundshëm për civilët.
Megjithëse më shumë se 160 vende kanë nënshkruar një traktat që ndalon përdorimin e tyre, Kievi i ka kërkuar ato që kur Rusia nisi pushtimin e saj në shkallë të plotë në fillim të vitit 2022 dhe forcat ruse i kanë përdorur në vijat e frontit.
Minat tokësore që do të dërgoheshin në Ukrainë janë mina tokësore “jo të qëndrueshme”, me një sistem energjie që zgjat vetëm për një kohë të shkurtër, duke i bërë pajisjet jo vdekjeprurëse.
Kjo do të thotë se – ndryshe nga minat e vjetra tokësore – ato nuk do të mbeten në tokë, duke kërcënuar civilët pafundësisht.
