Në Projektligjin për Qeverinë ka dispozita kontestuese që janë të papajtueshme me Kushtetutën, tha ministri i Drejtësisë Marko Kovaç. Ai në seancën e Qeverisë tha se ka pasur kohë t’i vë në dukje dhe se e vetmja e mirë është se “filluam nga një qorrsokak”. Kovaç beson se procesi nuk ishte mjaft gjithëpërfshirës, sepse departamenti i drejtuar prej tij nuk kishte përfaqësues në grupin e punës. “Ne sigurisht që do të thoshim se një draft i tillë të mos shkoj në Qeveri”, tha Kovaç. Ai tha se ky është një version i punës dhe se do të ketë mundësi që në seancën publike të theksohen të gjitha pikat kontestuese. Ministri i Administratës Publike Marash Dukaj tha se drafti do të jetë në diskutim publik. “Ky është hapi i parë, shumë i rëndësishëm, sepse për herë të parë Mali i Zi do të marrë një ligj për Qeverinë, qëllimi i të cilit është të rregullojë të gjitha çështjet me rëndësi për funksionimin e Qeverisë dhe organeve shtetërore”, tha Dukaj. Ministri për të drejtat e njeriut dhe të pakicave, Fatmir Gjeka, tha se nuk do ta votonte një propozim të tillë dhe shtoi se drafti duhet të kthehet për rishikim. “Ne kemi nevojë për ligj, por unë shpreh shqetësimin tim. Është më pak e rëndësishme që janë paraparë 14 ministri, kemi pasur lëvdata për ndarjen e departamenteve të drejtësisë dhe të drejtave të njeriut, sepse theksojmë rëndësinë e të drejtave të njeriut”, tha Gjeka. Sipas tij, sa më shumë afrohet Mali i Zi me BE-në, aq më shumë të drejtat e njeriut dalin në plan të parë. Gjeka tha se nuk mund të “rrëzohet” numri i ministrive, por të rregullohet në ndonjë mënyrë tjetër. Ai tha se do të votojë kundër Projektligjit. Qeveria në seancën e sotme është njohur me tekstin e Projektligjit për Qeverinë, me konstatim se debati publik do të fillojë më 1 shtator.
