Foto: AA
Banka Botërore raportoi se ndotja e ajrit merr jetën e rreth 5,7 milionë njerëzve çdo vit ndërsa 95 për qind e vdekjeve ndodhin në vendet me të ardhura të ulëta dhe të mesme, transmeton Anadolu.
Në një raport të titulluar “Përshpejtimi i aksesit në ajër të pastër në një planet të jetueshëm”, banka vlerësoi se ndotja e ajrit shkakton një humbje ekonomike ekuivalente me rreth 5 për qind të produktit të brendshëm bruto (GDP) global për shkak të efekteve të tij në shëndet, humbjeve të produktivitetit dhe reduktimit të jetëgjatësisë.
“Një qasje e integruar për shembull, hartimi dhe renditja e politikave që arrijnë qëllime të shumëfishta, si pavarësia e energjisë ose reduktimi i emetimeve, së bashku me masat për të reduktuar ndotjen e ajrit, mund të përgjysmojë numrin e njerëzve që marrin frymë nga nivele jo të shëndetshme të ndotjes së ajrit deri në vitin 2040”, thuhet në raport.
Shumica e ndotjes së ajrit të jashtëm në shkallë globale shkaktohet nga aktivitetet njerëzore, thekson raporti.
Ndryshimet e politikave në fushat që kontribuojnë në ndotjen e ajrit, si bujqësia, zhvillimi urban, transporti, industria, gatimi dhe ngrohja shtëpiake, mund të ndihmojnë në reduktimin e grimcave të dëmshme në ajër.
“Vendet duhet të kenë sisteme të dhënash të sakta, të besueshme, në kohë, pjesëmarrëse dhe transparente për monitorimin e cilësisë së ajrit dhe vlerësimin e efektivitetit të politikave”, thuhet më tej.
Politikat që arrijnë objektiva të shumëfishta në të njëjtën kohë, të tilla si masat që mbështesin pavarësinë e energjisë ose reduktojnë emetimet duke reduktuar ndotjen e ajrit, mund të ofrojnë një zgjidhje efikase dhe me kosto efektive për problemin.
Gjithashtu, përfitimet ekonomike të politikave të menaxhimit të integruar të ndotjes vlerësohet të arrijnë deri në 2,4 trilionë dollarë deri në vitin 2040.
