Shumica e Shteteve të Bashkuara po përgatiten për një tjetër stuhi të ftohtë dimërore, pasi vala e parë ka shkaktuar dhjetëra viktima, ndërprerje energjie dhe ka anuluar mijëra fluturime.
Të paktën 38 persona kanë vdekur, përfshirë tre fëmijë që ranë në një liqen të ngrirë në Teksas, dhe dhjetë të tjerë u gjetën të vdekur në Nju Jork. Në Maine, shtatë persona humbën jetën në një aksident avioni gjatë një stuhie dëbore. Shumë zona, sidomos në jug, po përballen me reshje të dendura dëbore dhe akull në rrugë, ndërsa afro gjysmë milioni familje dhe biznese janë pa energji elektrike. Aeroportet kryesore kanë pezulluar operacionet, me mbi 22,000 fluturime të anuluara që nga e shtuna.
Meteorologët parashikojnë që temperaturat do të mbeten shumë të ulëta, dhe një valë e re e ftohti mund të sjellë temperaturat më të ulëta në dekada dhe reshje të përhapura nga Kanadaja në bregun lindor të SHBA-së.
