Të paktën katër persona kanë humbur jetën pasi një zjarr përfshiu disa blloqe shumëkatëshe në një kompleks banimi në Hong Kong të mërkurën, njoftoi qeveria.
Mediat lokale raportuan se disa banorë ishin bllokuar brenda godinave.
Flakët e mëdha përfshinë skelat prej bambuje në të paktën tre blloqe apartamentesh në “Wang Fuk Court” në Tai Po, një lagje në pjesën veriore të qendrës financiare, përpara se të përhapeshin në pjesë të tjera të ndërtesave.
“Katër persona janë shpallur të vdekur, dy janë në gjendje kritike dhe një në gjendje të qëndrueshme”, deklaroi një përfaqësues i Departamentit të Shërbimeve të Informacionit të qeverisë.
Sipas mediave të Hong Kongut, njëri prej viktimave ishte zjarrfikës.
Të paktën një burrë dhe një grua u dërguan pa ndjenja në spital me djegie të rënda, ndërsa policia më herët kishte marrë raportime për banorë të bllokuar.
Re të dendura tymi u ngritën nga skelat e ndërtimit rreth shumë kullave banesore.
Për të mundësuar operacionin e shuarjes së zjarrit, u mbyllën edhe seksione të një autostrade aty pranë.
“Banorëve përreth u këshillohet të qëndrojnë brenda, të mbyllin dyert dhe dritaret dhe të ruajnë qetësinë”, njoftoi Departamenti i Shërbimeve të Zjarrfikësve.
“Anëtarët e publikut kërkohet gjithashtu të shmangin zonën e prekur nga zjarri.”
