Klubi i Taekwondosë “Besa” ka përfunduar me sukses paraqitjen në turneun tradicional ndërkombëtar në Korçulë, duke fituar katër medalje – dy të arta, një të argjendtë dhe një të bronztë.
Në këtë edicion të 26-të të turneut, që u mbajt në ishullin kroat Korçulë, klubi “Besa” mori pjesë me katër garues, dhe të gjithë arritën të ngjiten në podium.
Medalje të arta në disiplinën e formave fituan kadeti Barlet Bojaj dhe master-seniori Nikolla Junçaj.
Në të njëjtën disiplinë, pionierja Rina Dreshaj u rendit e dyta dhe fitoi medaljen e argjendtë.
Ndërkohë, në disiplinën e luftërave, kadetja Nora Rukaj siguroi medaljen e bronztë në kategorinë deri në 51 kilogramë.
Turneu në Korçulë mblodhi mbi 300 garues nga 26 klube të ndryshme, përfshirë pjesëmarrës nga Luksemburgu, Sllovakia, Serbia, Bosnja dhe Hercegovina, Mali i Zi dhe Kroacia.
