Zëvendëskryeministri i Qeverisë së Malit të Zi dhe ministrër i Punëve të Jashtme Ervin Ibrahimoviq mori pjesë sot në panelin e diskutimit “Ndikimi i diasporës në zhvillimin ekonomik të Malit të Zi” të mbajtur në kuadër të manifestimit “Ditët e diasporës dhe emigrantëve të Malit të Zi 2024”.
Ibrahimoviq tha se është i nderuar që ka mundësinë të kontribuojë në bashkëpunim më të ngushtë me vendet ku jeton diaspora jonë dhe ku janë arritur rezultate dhe suksese të rëndësishme në sfera të ndryshme të jetës shoqërore dhe politike.
“Besoj se në Mal të Zi është maturuar vetëdija se rritja e përgjithshme ekonomike nuk është e mundur pa aktivizuar të gjithë potencialin që ka vendi ynë. Diaspora me të gjitha resurset, njohuritë, aftësitë dhe rrjetet tashmë të ndërtuara të biznesit, paraqet një pasuri të paçmuar dhe një potencial të madh për përmirësimin e kushteve ekonomike në vendin tonë”, tha Ibrahimoviq.
Duke vlerësuar se diaspora është dega jonë më e fortë ekonomike, ai theksoi se duhet të punohet për të mundësuar investime më të lehta dhe më të shpejta, pa barriera administrative.
Ministri Ibrahimoviq theksoi se ndër prioritetet e punës së tij të ardhshme do të jetë krijimi i një bashkëpunimi edhe më të mirë dhe më të fortë me diasporën përmes rrjetit diplomatiko-konsullor, dhe “Mali i Zi, përmes angazhimit për përmbushjen e detyrimeve nga rruga evropiane dhe zbatimin e reformave kyçe, do të sigurojë stabilitet dhe siguri për të gjithë investitorët, përfshirë ata nga diaspora, në dobi të përparimit të përgjithshëm ekonomik.”
