Kryetari i komunës së Tuzit, Nik Gjeloshaj, ka njoftuar se të gjithë që dje ishin arrestuar, janë liruar. “Është dëshmuar në çdo kohë se me popullin tonë, mund të arrihen marrëveshje në forma njerëzore. Si dëshmia më e mirë e zgjidhjes së problemeve përmes dialogut është situata e sotshme në Tuz. Gjatë gjithë kohës, ne kemi bërë thirrje për dialog, nga e cili do të dilnin të kënaqura të dyja palët,” shkruan Gjeloshaj në rrjetin social “Facebook”. Gjeloshaj shprehet që pritjet janë që zv/Kryeministri Abazoviq dhe Ministrja e shëndetësisë Boroviniq Bojoviq të mbajnë fjalën e dhënë, sepse qytetarët e komunës së Tuzit janë duke e zbatuar zotimin e tyre. Kryetari Gjeloshaj përmes postimin të tij informoj publikisht qytetarët dhe pronarët e objekteve të gastronomisë, se Komuna e Tuzit, do të bëjë pagesën e gjobave eventuale. Gjithashtu, të gjitha subjektet gastronomike do të kenë ndihmë financiare. “Ne gjithmonë do të mbështesim bizneset tanë, jo vetëm gastronominë, por ato në përgjithësi, në mënyrë që Komunës sonë t’i japim drejtimin dhe përkrahjen më të mirë drejt zhvillimit ekonomik,” thotë Gjeloshaj. Ai shton se këtë do ta dëshmojnë me vepra, ku së shpejti qytetarët do të informohen lidhur me dy projekte, të cilat do të jenë projektet e shekullit për Komunën e Tuzit, për sa i takon zhvillimit ekonomik. “Motivim dhe kënaqësi edhe më të madhe për të vazhduar akoma më fuqishëm punën për zhvillimin e Komunës sonë, na jep mbështetja e madhe që përjetuam dje dhe sot nga të gjithë qytetarët e Malësisë dhe diasporës sonë! Së bashku do të jemi shembull edhe i zhvillimit ekonomik, por përherë do të dëshmojmë se këtë vend nuk mund ta përulë askush. Faleminderit nga zemra qytetarëve tanë, diasporës dhe miqve në përkrahje dhe mirëkuptim!,” thuhet në postimin e Gjeloshajt.
