Kryeministri i Republikës së Shqipërisë Edi Rama ndodhet në Jeruzalem, Izrael, për pjesëmarrjen në Konferencën Ndërkombëtare për Luftën kundër Antisemitizmit, ku zhvilloi një takim të veçantë me Kryeministrin izraelit Benjamin Netanyahu.
Takimi filloi me një bisedë kokë më kokë dhe vijoi me një takim mes dy delegacioneve, ku u diskutuan marrëdhëniet historike, bashkëpunimi ekonomik dhe angazhimi për paqen dhe sigurinë ndërkombëtare.
Netanyahu e mirëpriti Ramën duke e quajtur “mik të madh të popullit hebre dhe të shtetit izraelit” dhe theksoi se Shqipëria ka një rol unik në historinë e Holokaustit. Ai vuri në dukje se Shqipëria ishte i vetmi vend europian ku popullsia hebre u rrit dhe u mbrojt gjatë luftës, falë mikpritjes dhe tolerancës së shqiptarëve. Kryeministri izraelit përshkroi këtë trashëgimi si një shembull frymëzues për botën dhe nënvizoi rëndësinë morale të mbështetjes së Shqipërisë ndaj Izraelit gjatë krizave dhe sulmeve terroriste. Ai gjithashtu përmendi rritjen e numrit të turistëve izraelitë në Shqipëri dhe interesin në investime, duke theksuar hapjen e Dhomës së Tregtisë në Jeruzalem për të thelluar bashkëpunimin ekonomik.
Nga ana e tij, Kryeministri Rama theksoi lidhjen historike dhe morale midis Shqipërisë dhe Izraelit. Ai nënvizoi se Shqipëria qëndron e palëkundur kundër antisemitizmit dhe islamofobisë, dhe se solidariteti i popullit shqiptar është gjithmonë i orientuar drejt paqes dhe drejtësisë, duke respektuar të drejtat e të gjithë popujve. Rama u shpreh se qeveria shqiptare është e përkushtuar për të trashëguar dhe nderuar kurajën morale të gjyshërve të shqiptarëve që mbrojtën hebrenjtë gjatë Holokaustit. Kryeministri shqiptar gjithashtu përmendi rritjen e bashkëpunimit me Izraelin në fushën e mbrojtjes, sigurisë kibernetike dhe luftës kundër terrorizmit, duke falënderuar Izraelin për mbështetjen gjatë sulmit kibernetik të Iranit ndaj Shqipërisë. Rama shtoi se marrëdhëniet ekonomike, teknologjike dhe turistike midis dy vendeve janë në rritje, duke e bërë hapjen e Dhomës së Tregtisë në Jeruzalem një hap të rëndësishëm për zhvillimin e mëtejshëm të bashkëpunimit.
Në përfundim, të dy udhëheqësit theksuan rëndësinë e miqësisë historike dhe të vlerave të përbashkëta, duke e cilësuar marrëdhënien Shqipëri-Izrael si shembull frymëzues të bashkëpunimit midis dy popujve dhe të përkushtimit ndaj drejtësisë, paqes dhe solidaritetit ndërkombëtar.
