Një zjarr i madh pranë Eskisehirit në Turqinë perëndimore ka marrë jetën e të paktën 10 personave, përfshirë punonjës të pyjeve dhe anëtarë të skuadrave të shpëtimit që po luftonin me flakët.
Ministri turk i Bujqësisë, İbrahim Yumakli, konfirmoi se pesë punëtorë pyjesh dhe pesë shpëtimtarë humbën jetën.
Temperaturat e larta dhe erërat e forta kanë përhapur zjarret që nga mëngjesi i së martës, duke rrezikuar shtëpitë dhe detyruar evakuimin e disa fshatrave.
Viktimat u kapën nga flakët pasi zjarri ndryshoi papritur drejtim, duke i lënë të “digjeshin të gjallë,” sipas autoriteteve. Përveç të vdekurve, 14 persona janë duke u trajtuar në spital.
Ndërkohë, në Qipro, zjarrfikësit po përpiqen të ndalojnë një zjarr të madh që ka detyruar evakuimin e të paktën katër fshatrave, gjatë valës së nxehtësisë që ka ngritur temperaturat në ishull.
Zjarri po përhapej në veri të qytetit jugor Limasol, i nxitur nga erërat e forta dhe temperaturat e larta, ndërsa dëmet në zonën e njohur për vreshtat ishin të konsiderueshme.
Mëngjesin e të enjtes, autoritetet konfirmuan edhe dy viktima.
Presidenti i Qipros, Nikos Christodoulides, njoftoi se kishte kërkuar ndihmë për kontrollin e zjarrit përmes mekanizmave të BE-së, ndërsa Jordania do të dërgonte ndihma të tjera.
Temperaturat në ishull kanë arritur deri në 44 gradë Celsius, duke bërë ditën më të nxehtë të vitit deri tani dhe duke shtuar rrezikun e zjarreve.
