Foto: Qeveria e Malit të Zi / Vlada Crne Gore
Në mbledhjen e mbajtur sot, Qeveria e Malit të Zi ka miratuar propozimet për plotësimin e shtatë ligjeve me qëllim të harmonizimit me Projektligjin për vlerësimin e unifikuar të invaliditetit.
Kjo masë përfaqëson një hap të rëndësishëm drejt reformimit të sistemit të vlerësimit të invaliditetit në përputhje me modelin e të drejtave të njeriut.
Qëllimi i këtyre ndryshimeve është të sigurohet një qasje e unifikuar dhe e qëndrueshme në vlerësimin e invaliditetit, duke lehtësuar dhe përmirësuar realizimin e të drejtave të personave me aftësi të kufizuara në fusha të ndryshme si arsimi, punësimi dhe mbrojtja sociale, pa barriera shtesë administrative.
Ligjet që propozohet të plotësohen janë:
- Ligji për mbrojtje sociale dhe për fëmijë,
- Ligji për sigurim pensional dhe invalidor,
- Ligji për mbrojtjen e veteranëve dhe invalidëve,
- Ligji për lehtësira udhëtimi për personat me invaliditet,
- Ligji për rehabilitim profesional dhe punësimin e personave me invaliditet,
- Ligji i punës,
- Ligji për edukimin dhe arsimimin e fëmijëve me nevoja të veçanta arsimore.
Qeveria ka theksuar se harmonizimi i ligjeve është thelbësor për të shmangur pasigurinë juridike dhe për të siguruar një reformë gjithëpërfshirëse të sistemit të vlerësimit të invaliditetit, në përputhje me nevojat e personave me aftësi të kufizuara.
