Mali i Zi rishikoi kuadrin ligjor që garanton pavarësinë dhe paanshmërinë e sistemit gjyqësor, sipas Raportit mbi Sundimin e Ligjit të publikuar nga Komisioni Evropian (KE).
Sistemi gjyqësor i Malit të Zi po kalon një fazë intensive reformash, të cilat përfshijnë miratimin dhe rishikimin e një pakete gjithëpërfshirëse ligjesh, me qëllim zgjidhjen e çështjeve sistematike të pavarësisë, përgjegjësisë dhe paanshmërisë në gjyqësor dhe prokurori, si dhe përafrimin e mëtejshëm me standardet evropiane dhe ndërkombëtare.
Kështu thuhet në Raportin e Komisionit Evropian për sundimin e ligjit për Malin e Zi. Mali i Zi, siç u theksua, rishikoi kuadrin ligjor që garanton pavarësinë dhe paanshmërinë e sistemit gjyqësor dhe në maj miratoi një strategji të re të reformës gjyqësore 2024-2027.
“Vonesat e konsiderueshme në emërimin e gjyqtarëve të nivelit të lartë kanë ndikuar në sistemin gjyqësor, megjithatë, deri më tani mbetet vetëm emërimi i kryetarit të ri të Gjykatës së Lartë. Promovimi dhe zbatimi i etikës dhe standardeve profesionale midis gjyqtarëve dhe prokurorëve mbetet një sfidë”, thuhet në dokument.
Kur bëhet fjalë për perceptimin e korrupsionit, raporti tregon se indeksi i perceptimit të korrupsionit në vendet kandidate është nën mesataren – Mali i Zi 45, Maqedonia e Veriut 40, Shqipëria dhe Serbia 36.
Efektiviteti i gjyqësorit, siç theksohet më tej, pengohet nga mungesa e investimeve strategjike në burimet njerëzore dhe infrastrukturë.
Vihet re se ka sfida serioze sa i përket efikasitetit të gjyqësorit, ku kohëzgjatja e procedurave në çështjet administrative është rritur shtesë.
