Foto: Reuters
Delegacioni i Parlamentit Evropian për çështjet e buxhetit do të vizitojë Malin e Zi javën e ardhshme.
Siç bëhet e ditur nga Brukseli, qëllimi i vizitës është njohja me zbatimin e Planit të Rritjes, por edhe me situatën politike aktuale në vend. Plani i Rritjes për Ballkanin Perëndimor është një nga instrumentet themelore të politikës financiare të BE-së për rajonin.
Deputetët e Parlamentit Evropian nga Komisioni për Buxhetin do të shohin nga afër se si po zbatohet ky plan në praktikë.
“Ky është misioni i parë i tillë i Komisionit për Buxhetet në rajon, dhe për këtë arsye është e rëndësishme për ne të vërtetojmë nëse Plani i Rritjes funksionon ashtu siç është konceptuar – me një nivel të lartë transparence, por gjithashtu me një vlerë të shtuar të qartë evropiane për gjithë Evropën Juglindore, dhe në këtë rast konkret, për Malin e Zi,” deklaroi Karlo Resler.
Anëtarët e komisionit do të shqyrtojnë gjithashtu implikimet e mundshme buxhetore në rast të anëtarësimit të Malit të Zi në kuadrin financiar shumëvjeçar pas vitit 2027.
Resler thekson se ende ka kohë për të përcaktuar me saktësi këto çështje.
“Ju e dini që në kuadrin aktual financiar shumëvjeçar ekziston një klauzolë që parashikon mundësinë e një rishikimi të ri në rast të çdo zgjerimi të ri. Ashtu ndodhi edhe kur Kroacia iu bashkua Bashkimit Evropian. Mendoj se tani është ende herët, nuk jemi ende në atë fazë që të diskutojmë konkretisht për këtë. Këto janë dy procese të ndara – procesi i negociatave po vazhdon rrjedhën e vet,” tha Resler.
Komisioni Evropian pritet të paraqesë propozimin për buxhetin e ardhshëm afatgjatë të Bashkimit Evropian në muajin korrik.
Ky buxhet përpilohet për një periudhë shtatëvjeçare dhe me të përcaktohen kufijtë maksimalë të shpenzimeve për politika të ndryshme.
