Shtetet e Bashkuara janë tërhequr zyrtarisht nga Organizata Botërore e Shëndetësisë (OBSH), duke lënë agjencinë e OKB-së pa një nga donatorët e saj më të mëdhenj.
Presidenti amerikan Donald Trump kishte nënshkruar një urdhër ekzekutiv për të sinjalizuar tërheqjen një vit më parë, duke kritikuar OBSH-në se ishte tepër “e orientuar nga Kina” gjatë pandemisë së Covid-19.
Departamenti Amerikan i Shëndetësisë dhe Shërbimeve Njerëzore tha se vendimi u mor për shkak të keqmenaxhimit të pandemisë nga OBSH, pamundësisë për reforma dhe ndikimit politik nga shtetet anëtare, raporton BBC.
OBSH i ka hedhur poshtë këto akuza. Drejtori i Përgjithshëm, Tedros Adhanom Ghebreyesus, deklaroi se tërheqja është një humbje si për SHBA-në ashtu edhe për botën, duke theksuar rolin e organizatës në luftën kundër poliomielitit, HIV/AIDS-it, vdekshmërisë së nënave dhe traktatin ndërkombëtar për kontrollin e duhanit.
Pas pandemisë, shtetet anëtare të OBSH-së punuan për krijimin e një traktati ndërkombëtar për pandemitë, i cili synon parandalimin, përgatitjen dhe reagimin ndaj pandemive të ardhshme, përfshirë shpërndarjen më të drejtë të vaksinave dhe barnave. Traktati u miratua në prill të vitit të kaluar nga të gjitha shtetet anëtare, përveç SHBA-së.
SHBA ka qenë tradicionalisht një nga donatorët më të mëdhenj të OBSH-së, por nuk ka paguar kontributet për vitet 2024 dhe 2025, gjë që ka shkaktuar humbje të mëdha vendesh pune në organizatë.
Avokatët e OBSH-së thonë se SHBA ka detyrim të paguajë rreth 260 milionë dollarë borxhe, por Uashingtoni ka deklaruar se nuk sheh arsye për ta bërë këtë.
Autoritetet amerikane njoftuan se të gjitha fondet qeveritare për OBSH-në janë ndërprerë, personeli amerikan është tërhequr nga selia në Gjenevë dhe zyrat në mbarë botën, ndërsa qindra bashkëpunime janë pezulluar ose ndërprerë.
Në një deklaratë të përbashkët, Sekretari i Shëndetësisë Robert F. Kennedy dhe Sekretari i Shtetit Marco Rubio thanë se OBSH “ka braktisur misionin e saj themelor dhe ka vepruar kundër interesave të Shteteve të Bashkuara”.
OBSH ka bërë të ditur se çështja e tërheqjes së SHBA-së do të jetë në rendin e ditës në mbledhjen e ardhshme të bordit drejtues, që do të mbahet nga 2 deri më 7 shkurt.
