Foto: Shutterstock
Pavarësisht deklaratave të shpeshta, sidomos para zgjedhjeve, se nuk do të ketë më zgjedhje pa pastrimin e listës zgjedhore, kjo çështje vazhdon të mbetet e pazgjidhur.
Zoran Vujiçiq nga Agjencia për Mbrojtjen e të Dhënave Personale thekson se është humbur një rast i mirë për të ndryshuar nenin 77 të Ligjit për zgjedhjen e këshilltarëve dhe deputetëve, i cili lejon partitë politike të fotokopjojnë materialet zgjedhore, përfshirë listat e votuesve, dhe t’i përdorin ato për qëllime të ndryshme.
Ky ligj është në kundërshtim me Ligjin për listën zgjedhore, i cili lejon vetëm qasje, jo fotokopjim. Vujiçiq beson se kjo është një mundësi e humbur për të mbrojtur më mirë të dhënat personale të qytetarëve.
Sekretari shtetëror në Ministrinë e Brendshme, Novica Obradoviq, deklaroi se pa një listë të pastruar të votuesve nuk mund të ketë proces zgjedhor të rregullt.
Ai thekson se shumë shtetas të Malit të Zi që jetojnë jashtë vendit nuk kanë banim në Mal të Zi, por megjithatë figurojnë në listat zgjedhore dhe kanë të drejtë vote, gjë që, sipas tij, duhet të rregullohet me ligj.
Ministri i Administratës Publike, Marash Dukaj, shton se reforma zgjedhore nuk mund të jetë e plotë pa rregullimin e plotë të listës zgjedhore, e cila ka krijuar mosbesim mes qytetarëve dhe partive politike për vite me radhë.
Ai gjithashtu kërkon futjen e masave afirmative për pakicat kombëtare dhe thekson nevojën për të garantuar të drejtën e qytetarëve për të zgjedhur drejtpërdrejt përfaqësuesit e tyre dhe kryetarët e komunave.
